روغتیا

د هوږې خوړلو يوه ډيره حيرانوونکې ګټه ښکاره شوه

امریکايي څېړونکو دا څرګنده کړې چې هوږه د روغ زړه لپاره ولې ښه ده. هغوی وايي دا راز د هوږې په هغې مادې کې پټ و چې (ایلیسین)نومېږي.

همدا ماده سبب کېږي چې د هوږې له خوړلو وروسته مو له خولې بد بوی ځي. ساینسپوهانو په خپلو څېړنو کې مالومه کړې چې همدا ماده (ایلیسین) د وینوله سرو ګولوبولونو سره یوځای کېږي او هایدروجن سلفایډ پیدا کوي او په نتیجه کې یې د وینو پر شریانونو او رګونو فشار کمېږي او د وینو جریان اسانېږي.

د امریکا د الباما پوهنتون له لوري په دې څېړنه کې د امریکا د ساینس د ملي اکاډیمۍ څېړنې هم رول لري. هغوی وايي کله چې یې د څېړنې په ترڅ کې د وینې سره ګولوبولونه د هوږې په شیرې یا اوبو کې واچول نو د هغو په ټینګوالي کې دوه اویا فیصده توپیر راغی.

د دې څېړنې د ډلې مشر ډاکتر ډیوید کراس وویل «زموږ د دې څېړنې له پایلو ښکاره شوه چې په خوړو کې د هوږې شتون ډېر ګټور دی او همدا علت دی چې د لېرې ختیځ په څېر هغو هیوادونو کې چې هوږه زیاته خوړل کېږي، د زړه ناروغۍ کمې دي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *