Category: روغتیا

  • سرکه او د هغې روغتیایي ګټې

    سرکه او د هغې روغتیایي ګټې

    سرکه د خپلې روغتیا دوست وګڼئ . سرکه په پراخه پیمانه هغه مغذي مواد لري، چې له ډنګرېدو سره مرسته کوي، د خوړو هضم آسانوي او له داسې خواصو څخه برخمنه ده، چې له کولیسټرول، د وینې لوړ فشار، زړښت او د غوږ عفونت سره مقابله کوي .

    په ۲۰۰۵ ز کال په سویډن کې ترسره شوې څېړني ښیي : په خوړنیزو توکو باندې د سرکې ور زیاتول د خوړو له خوړلو وروسته مړښت را منځته کوي او په دې ترتیب په اوږد مهالې توګه د کالوریانو د جذب کچه را ټیټوي .

    سرکه اندېښنه او سودا له منځه وړي، د صفرا کچه را ټیټوي او زړه ژوندی ساتي . د حضرت نبي کریم (ص) د خوښې وړ خواړه سرکه او د زیتونو تېل وو . سرکه ذهن پیاوړی کوي او عقل زیاتوي .

    کومه سرکه چې د انګورو له تخمر څخه تر لاسه کېږي، تر ډېره په سلاډ کې ترې ګټه اخیستل کېږي، هر کله چې په نورو خوړو کې ترې ګټه واخیستل شي، نو خوړو ته ښه خوند ور بښي او د خوړو په هضم کې مرسته کوي . سرکه د تېزابي ( تریو اوسېدلو ) د خاصیت په لرلو سره، په خوړو کې د میکروبونو له ودې څخه مخنیوی کوي . سرکه هغو کسانو ته زیان رسوي، کوم چې د غړو په درد او د اعصابو په کمزورۍ اخته وي . که چېرې په مزمنو او اوږد مهالو سر خوږیو اخته یاستئ، نو سرکه بوی کړئ او یا یې هم جوړش کړئ او له بخار څخه یې ګټه واخلئ، نو ستاسو د سر خوږي په له منځه وړلو کې به اغېزمن رول ولوبوي . سرکه د هغو کسانو له پاره، چې غواړي ډنګر شي، ډېره ګټوره ده؛ خو په دې شرط، چې د معدې په ټپ باندې اخته نه وي .

    که چېرې غوږونه مو درانده دي او یا هم زنګهاری کوي، څو څاڅکي سرکه مو په غوږونو کې وڅڅوئ، ترڅو یې اغېزمنه ګټه ووینئ .

    د وریو د پیاوړتیا او د هغو له وینې بهېدنې ( خونریزي ) څخه د مخنیوي له پاره، څو څاڅکي سرکه په یوه ګیلاس اوبو کې وڅڅوئ او یوه اندازه مالګه هم ور زیاته کړئ او غر غړه یې کړئ . که چېرې په نقرس اخته یاستئ، د وربشو له اوړو سره د سرکې مخلوط جوړ کړئ او معجزه یي اغېز یې ووینئ . کومې ترشیانې چې له سرکې سره جوړېږي، ډېره زیاته ګټه لري او سرکه د مېوو، سبزیو او د هغو د ګټو ساتونکې ده .

    له غاښ ایستلو وروسته، که چېرې وینه په آسانۍ نه بندېږي، لږ سرکه له اوبو او مالګې سره مخلوطه او غر غړه یې کړئ، وینه بهېدنه به بنده شي . سرکه د درندو خوړو هضم آسانوي او سرکه د دې سبب ګرځي، چې ژونکو ( حجرو ) ته خوړنیز توکي ډېر ورسېږي او چټک نفوذ وکړي .

    سرکه د وینې او صفراوي عفونتونه له منځه وړي او تر یوه بریده د وینې له سرطان څخه مخنیوی کوي او د مزاج تریخوالی را کموي . سرکه د معدې د چینجي قاتله ده؛ په دې شرط چې څو څاڅکي یې په پرله پسې توګه د سبا ناري پرمهال وڅکئ . د سر خوږي او یا لمر وهلي د ښه والي له پاره یو دستمال په توده سرکه لوند کړئ او د ناروغ په وچویلي باندې یې کېږدئ، ناروغ ته به ډېره زیاته ګټه ور ورسوي .

    هغه کسان چې اعصاب یې کمزوري دي، نباید سرکه وخوري، مګر دا چې له شاتو او نورو درملو سره مخلوطه شي، سره له دې هم باید ډېره ونه خوړل شي .

    ښه ده چې په وروستیو کې د انګورو د سرکې د جوړولو کړنلاره هم درنو لوستونکو ته وړاندې کړو :

    د انګورو د سرکې د جوړولو کړنلاره :

    خواږه، پاخه او سالم انګور دانه دانه کړئ او لرګکي یې لرې وغورځوئ، له دې وروسته د انګورو دانې په یوه خټین ګړي کې واچوئ، د ګړي خوله کلکه وتړئ او په یوه تود ځای کې یې کېږدئ او څلوېښت ورځې یې خوله مه پرانیزئ . له یادو شوو ورځو وروسته، تریو شوي انګور صاف کړئ، اوبه یې په بوتلونو کې واچوئ او لمر ته یې کېږدئ، څو ورځې وروسته سرکه مصرفولو ته چمتو ده او کولای شئ، ګټه ترې واخلئ .

    باید په یاد ولرئ، چې خام انګور د غورې په نامه یادېږي، خوند یې تریو او قبضیت را منځته کوي . غوره یوه له ګټورو څکونکو څخه ده، چې د ډنګرېدو په رژیم کې اغېزمنه ده. د غورې په خوړولو کې افراط، معده کمزورې کوي، د با ځواک ته زیان رسوي، په خېټه او کولمو کې د باد د رامنځته کېدو سبب ګرځي .

    د انګورو د غورې اوبه د خولې د پړسوب د له منځه وړلو د وریو د نرمښت له پاره کارول کېږي . د انګورو د غورې اوبه د روماتیزم او نقرس ضد دي او د نجونو بلوغ وروسته کوي .

    ژباړه : عطا محمد میاخېل

  • د غاښو سپينولو 5 طريقې

    د غاښو سپينولو 5 طريقې

    ټول غواړي چې غاښونه یې سپین او ښکلي وي؛ ځکه پاک او سپین غاښونه پر ځان باور ډېروي او د خبرو کولو پر مهال انسان پر ځان ویاړي او نورو ته هم ښه ښکاري. دلته مو څو اسانه لارې چارې درته په ګوته کړې دي چې په عملي کولو سره یې کولی شی ښکلي او سپین غاښونه ولری.

    ۱-له سوډا څخه ګټه واخلئ

    سوډا د غاښونو د کريمو په څېر کار ورکوي. له وېرې پرته یوه کاچوغه سوډا له اوبو سره ګډه کړی او خپل غاښونه پرې ومینځئ.

    ۲- ځمکني توت وخورئ

    که تاسو فکر کوی چې د ځمکنيو توتو سور رنګ به مو د غاښونو رنګ هم سور کړي، نو تېروتنه کوی. په ځمکنیو توتو کې شته مالیک اسيد چې یو ډول پاکوونکې ماده ده، د غاښونو د سپینوالي او پاکوالي لامل کېږي.

    ۳- مڼې وخورئ

    مڼه نه یوازې دا چې د بدن لپاره ګټوره ده، بلکې غاښونه هم پاکوي او ځانګړې ځلا او ښکلا ورکوي.

    ۴- اوبه یا شیدې وڅښئ

    په شيدو کې شته کلسیم د غاښونو د پیاوړتیا لامل کېږي. پر دې سربېره شیدې او اوبه هغه مایعات دي چې په وسیله یې غاښونه پاکېږي او ځلا پیدا کوي.

    ۵- پنېر

    بل هغه خواړه چې پر پیاوړتیا سربېره غاښونه سپینوي، پنیر دی. په اصل کې پنېر او شیدې د غاښونو لپاره ډېره ګټه رسوي.

  • که د پښو له بدبويۍ کړیږئ نو لاندې طریقې تجربه کړئ

    که د پښو له بدبويۍ کړیږئ نو لاندې طریقې تجربه کړئ

    پښې بدبويي دوه لاملونه لري چې یو يي د بدن زیاته خوله کول او دوهم يي د باکتریا ځینې ډولونه دي. باکتریا په بدن کې ځینې ګازونه تولیدوي چې د پښو بدبویۍ لامل ګرځي.

    د پښو بدبويي له منځه وړلو لپاره لاندې لارې ډیر ګټور ثابتیدلی شي:

    ۱- اپسوم (Epsom) مالګه: اپسوم مالګه د پښو بدبويي له منځه وړلو سربیره د پښې درد هم اراموي.

    ضروري توکي:

    ۱/۲ پیاله اپسوم مالګه

    ۸ ګیلاسه ټړمې اوبه

    پښو وچولو لپاره ټوټه

    طریقه: ۲/۱ پیاله مالګې په ۸ ګیلاسه ګرمو اوبو کې واچوئ او خپل پښې د ۳۰ دقیقو لپاره دغه اوبو کې کیږدئ. دغه عمل د څه مودې لپاره د ورځې دوه ځلي تکرار کړئ.

    ۲- بکینګ سوډا (Baking Soda) او ستروس: بېکینګ سوډا د استعمال ډیر ځایونه لري خو د پښو په برخه کې معجزه کوي. بېکینګ سوډا په طبیعي ډول د پښو بدبويي له منځه وړي، مضر باکتریا ختموي او پښې په ارامولو کې مهمه ونډه لري.

    لیمو د بدن او پښو خوله کوم چې د پښو بدبويي سبب ګرځي مخه نیسي او انسان تازه کوي.

    ضروري توکي:

    ۱/۴ پیاله بېکینګ سوډا

    ۸ ګیلاسه اوبه

    د ۱ لیمو اوبه

    پښو وچولو لپاره ټوټه

    طریقه: ۱/۴ پیاله اوبه په یوه لوښي کې واچوئ او ۸ ګیلاسه ګرمې اوبه پرې زیاته کړئ. دغه محلول کې د یو لیمو اوبه زیاته کړئ او خپل پښې دغه اوبو کې ډوب کړئ. دغه عمل ۱۵-۲۰ دقیقو لپاره ادامه ورکړئ او بیا خپلې پښې وچې کړئ.

  • په ګرمو اوبو حمام کولو له دغه حيرانوونکو ګټو خبر شى

    په ګرمو اوبو حمام کولو له دغه حيرانوونکو ګټو خبر شى

    د ډیرو بوختیاو له کبله ذهني خپګان/ډپریشن یوه عامه ناروغي ګرځېدلې ده، د پوهانو په وینا د نړۍ هر درېیم کس د ذهني فشار یا خپګان سره مخ دی، او دغه ناروغي د زیات کار او په ژوند کې د ډول ډول پېښو سره مخ کېدلو نه رامنځته کیږي.

    پوهانو څیړنه ترسره کړې چې د بدني فعالیت او ورزش کولو سربېره په ګرمو اوبو غسل کول له انسان څخه د ذهني خپګان په له منځه وړلو کې مرسته کوي.

    ددې لامل دا ښودل شوی چې په ګرمو اوبو غسل سره د انسان بدن د حرارت درجه نورمال حالت ته راشي، چې په مرسته یې له درمل او ورزش څخه هم ښه او چټک اغیز کوي.

    د جرمني فرائبراګ پوهنتون پوهانو د یوې څيړنې له مخې له ۴۵ ناروغانو چې عمرونه یې په اوسط ډول ۴۸ کاله و ازموینه واخیسته، دوی په دغه ازموینه کې په ډپریشن او ذهني خپګان اخته ناروغان د دوه اوونیو لپاره په اوونۍ کې دوه واره په ګرمو اوبو غسل ورکړ او ورسره یې د ورزش سپارښتنه هم وکړه.

    پوهان زیاتوي چې په ګرمو اوبو غسل کول د انسان د حرارت درجه نورمال او داخلي سیستم غوره کوي چې ورسره ذهني خپګان، فشار او ډپریشن کمیږي.

  • پنځه (۵) څېزونه چې ښځې يې بايد د اميدوارۍ په وخت کې پوره پاملرنه وکړي

    پنځه (۵) څېزونه چې ښځې يې بايد د اميدوارۍ په وخت کې پوره پاملرنه وکړي

    پنځه (۵) څېزونه چې ښځې يې بايد د اميدوارۍ په وخت کې پوره پاملرنه وکړي

    د حمل يا اميداورۍ دوره د مور لپاره ډېره اړينه او له پاملرنې ډکه دوره ده، کله چې يوه ښځه اميدواره وي او يا حمل ولري، نو په کورني ژوند کې يې په دې پار بايد لاسنوی وشي، چې د دوو کسانو ژوند او روغتيا د يو کس په ژوند او روغتيا کې نغښتي دي.

    اړيڼه ده، چې د اميدوارۍ په وخت کې د هر ډول درنده کارونو، اندېښنو او کورني تاوترېخوالي مخ ډب شي، پر ځای يې د مور لپاره روغتياي خواړه، استراحت او د خوښ وخت زمينه برابره شي.

    په دې لېکنه کې درته هغه پنځه شيان په ګوته کوو، چې د مور يا اميداورې ښځې لپاره د اميداورۍ يا حمل په وخت تر جدي پاملرنې لاندې بايد وساتل شي.

    ۱- کوم څېزونه بايد وخوړل شي او کوم بايد ونه خوړل شي: د اميدوارۍ په وخت کې غذايي رژيم داسې نه وي لکه کوم ډول چې په عادي وخت کې وي. ډاکټران د ځينو ځانګړي خوراکونو د خوړلو، د ځينو نورو د نه خوړلو توصيه کوي.

    هغه څېزونه چې د اميدوارۍ په وخت کې يې په لومړۍ درجه د نه خوړلو توصيه کيږي، نشه يي توکي، الکول او کافئين استعمال دی. د اميدوارۍ په وخت کې د الکلو او کافئين څخه ګټه اخېستنه لامل کيږي، ترڅو ماشوم مخکې له وخت څخه پيدا شي، چې په انګلېسي کې ورته premature وايي.
    هغه خوراکونه چې د اميدوارۍ په وخت کې يې د خوړلو توصيه کيږي، عبارت دي له ميوې، ترکارۍ، ويټامين او پروټين لرونکي خواړ او نور.

    ۲- فزيکي تمرين: د سالم ماشوم زږېدنه د اميدوارۍ په وخت کې او همدارنګه د ماشوم د زېږدنې په وخت کې د مور سالم او روغتيايي وجود ته اړتيا لري. د اميدوارۍ په وخت کې د استراحت په نوم په ځای کېناستل او يوازې خوب کول، د ګتې نه بلکې د ضرر خبره ده.

    د ماشوم مور اړه ده، ترڅو په منظم ډول سره سپورټ او فزيکي تمرين ولري، چې په وجود کې وينه په ښه ډول سره حرکت وکړي، مور او ماشوم ته دواړو ته په پوره اندازه اکسېجن او غذايي مواد ورسيږي.

    فزيکي تمرين کولی شي چې د اميدوارۍ او زېږون په وخت کې په مور باندې درد کم کړي. د اميدوارۍ په وخت کې د مور نس دروند وي نو د يو لړ دردونو لامل کيږي او همدا ډول د زېږون په وخت کې د ماشوم پيدا کېدل د دردونو سبب ګرځي، نو که چېرې مور د اميدوارۍ په وخت کې منظم فزيکي تمرينونه تر سره کړي، نو د اميدوارۍ او زېږون د دردونو په کمښت کې ورسره مرسته کولی شي.

    خو بايد ياودنه وشي، چې درنده فزيکي کارونه چې د ماشوم د له منځه تګ لامل کيږي او په منظم فزيکي تمرين توپير لري او بايد توپير يې وشي.

    ۳- لباس او بوټان: د اميدواري په وخت غوره ده چې تر ډېره ازاد لباس واغوستل شي. ازاد لباس د مور او ماشوم دواړو لپاره روغتيايي دی. هغه لباس چې ډېر تنګ وي نو پرته له اميدوارۍ يې هم د نه اغوستلو توصيه کيږي، خو د اميدوارۍ په وخت بايد په جدي ډول ترې ډډه وشي.

    همدا ډول هغه بوټان او يا څپلۍ چې جګ او لوړ پوندې ولري، بايد وانه غوستل شي، چې د وجود موازنه خرابه وي او همدا ډول د لوېدول امکان يې زيات وي.

    ۴- د کورني تاوترېخوالي مخنېوی: په کور کې د ښځې او خاوند او همدا ډول د کورنۍ د نورو غړو ترمنځ ستونزې، جګړې او تاوترېخوالي په عادي ډول هم د اندېښنو، تشويش او خپګان لامل کيږي، چې کورنۍ خوږ ژوند په تريخ او له اندېښنو په ډک ژوند بدلوي.

    د اميدوارۍ په وخت کې د مور تشويش او اندېښنې نه يوازې په مور اغېز کوي، بلکې مستعقيم اغېز يې په ماشوم باندې هم وي. د ماشوم روغتيا د مور په روغتيا کې نغښتې ده، چې بايد پاملرنه يې وشي.

    ۵- طبي معاينات: د حمل له لومړۍ مياشتې څخه بيا تر ورستۍ پورې، د روغتيايي معايناتو ترسره کولو د زېږون په وخت کې ستونزې له منځ وړي او ماشوم سالم او روغ نړۍ ته راځي.

    که چېرې په حمل کې کومه ستونزه موجوده وي او يا هم ځېني نورې ناروغۍ چې په ماشوم او زېږون باندې بد او منفي اغېز لري، نو غوره ده چې مخکې له ډېروالي او سختوالي يې درملنه او اعلاج وشي.

  • د پښو د بدبوۍ لاملونه او اسانه درملنه

    د پښو د بدبوۍ لاملونه او اسانه درملنه

    تر ډېره به مو لېدلي وي، چې د بوټانو او جورابو په اغوستلو د ځيني کسانو پښې بد بوی ورکوي، چې چاپيره نورو کسانو ته د ناراحتۍ لامل کيږي او همدارنګه هغه کس چې دا ستونزه ولري د شرم احساس کوي، په خپله جورابي د پښو د بوی لامل نه دی، ځکه که پرته له بوټانو څخه د څو روځو لپاره هم يوازې جورابې واغستل شي نو کوم بد بوی نه ورکوي، خو له بوټانو سره يوځای دجورابو اغوستل د بدبوۍ لامل کيږي.

    د پښو بدبوي ډېر لاملونه لري او په اسانۍ سره يې مخنيوی هم شونی دی. په دې لېکنه درته په دې خبرې کوو، چې د پښو د بدبوۍ لاملونه په څه کې دي او څه ډول کولاي شو چې دپښو د بدبوۍ مخنيوی وکړو.
     
    ۱- د پښو د بدبوۍ لاملونه:
    – خولې sweat: د ډېر پلي مزل، فزيکي کار، ډوډۍ خوړلو او ګرمۍ په وخت کې د انسان وجود خولې کيږي، د انسان د وجود خولې هېڅ ډول بوی نه لري، خو د خولو په شتون کې مضرو بکترياوو ته داسې يو ځای به لاس ورځي چې بکترياوې په کې خوښې وي، په خولو کې د بکترياوو فعاليت د خولو بوی په ناراحت کوونکي بوی بدلوي. نو په پايله هغه بوی چې د بکترياو له امله يې خولې يې ورکوي، ناراحت کوونکی او خراب بوی دی، چې ډېری خلک ورڅخه د خلاصون او لېرې والي هڅه کوي.

    د پښو د بدبوۍ يو عمده لامل هم خولې دي. هرکله چې هوا ګرمه وي، بوټان او ډبلې جورابي په پښو وي، نو پښې خولې کيږي، چې له دوو يا درو ساعتونو وروسته بيا بد بوی ورکوي.

    – پليسټر او نايلون جورابې: جورابې تر ډېره له پليسټر او نايلون څخه جوړيږي، هغه جورابي چې له پليسټر او نايلون څخه جوړې وي په اغوستو سره يې د پښو بدبوي زياتيږي، پليسټر او نايلون داسې ټوکر دی، چې هوا ورڅخه په اسانۍ سره نه تېرېږي. نو هر کله چې نايلوني او پليسټري جورابې په پښو شي، پښې هوا نشي اخېستلی، خولې کيږي او بدبوی ورکوي.

    – پرته له جورابو بوټان: پرته له جورابو د بوټانو اغوستل د پښو بدبوي زياتوي، کله چې يوازې بوټان واغوستل شي، نو ټولې هغه خولې او په خولو کې بکترياوې چې د بندې هوا له امله منځ ته راغلې دي، په پښو پورې نښلي او بدبوي زياتوي. خو که له بوټانو سره جورابې واغوستل شي، نو بيا د خولو او بکترياوو ډېره شمېره د جورابو په وسيله جذب کيږي چې د پښو د بدبوۍ په کموالي کې مرسته کوي.
     
    — د پښو پوستکی: هغه کسان چې وزن يې ډېر وي نو پوستکی يې په ډېر شمېر مړې حجرې توليدوي، د وجود د نورو برخو په ډول پښې هم مړې حجرې غورځوي. له خولو پرته د پښو د پوستکي مړې حجرې هم د بدبوۍ لامل کيږي.

    د پښو د بدبوۍ مخنوی او درملنه:
    – هرکله چې پښې مينځی نو يوازې پر اوبه او صابون مه وهئ، پښو ته مو مالش ورکړئ يعنې په لاسونو سره يې کلکې – کلکې ومېنځئ. په دا کار سره هغه بکترياوې چې د خولو په اساس منځ ته راغلي او همدا ډول د پوستکي هغه مړې حجرې چې د بدبوۍ لامل کيږي له منځه ځي.

    – پښې مو په مکمل ډول وچې کړئ: هر کله چې بوټان او جورابې په پښو کوئ، نو پوره متوجې اوسئ چې په لندو پښو يې په پښو نه کړئ. لندې پښې د بکترياو لپاره داسې يو چاپيريال منځ ته راوړي چې د بکترياوو د خوښې وړ وي، چې په پايله کې د پښو د بدبوۍ سبب کې کيږي. کل چې پښې ومېنځي او لندې شي او يا هم د خولو په وسيله لندو پښو باندې جورابې او بوټان مه اغوندئ، ترڅو مو چې په يوې نرمې ټوټې سره وچې کړي نه وي.

    – د خولو ضد پوډر او يا مايع څخه ګټه واخلئ: په اوس وخت کې په بازار کې د خولو او بکترياوو ضد ډول ډول صابون، شامپو، پوډر او نور پيدا کيږي چې ورته antiperspirant وايي، نو که چېرې د پښو بوی زيات وي غوره ده چې له يادو څېزونو ګټه واخېستل شي.

    -بوټان و که دپښو بدبوي ډېره وي، نو پرته له اړين وخت څخه بوټان مه اغوندئ، پرځای يې څپلۍ او نور خلاص بوټان واغوندئ، چې د پښو پوستکی په ازاده فضاء کې تازه هوا واخلي.

    – په ورځ کې دوه ځلې او يا هره ورځ جورابې بدلې کړئ: غوره ده چې د پښو د زیات بوی په وجه په ورځ کې دوه ځلې جورابې بدلې شي، که دوه ځلې نه وي نه هره ورځ بايد پاکي او مېنځل شوې جورابې واغوستل شي. او همدارنګه د ډېرو ډبلو جورابو له اغوستلو هم ډډه وکړئ.

    – په بوټانو کې د لونګو دانې واچوئ: که د ډېر اوږد وخت لپاره بوټان په پښو کوی، نو بيا د لونګو څو دانې په بوټانو کې واچوئ، د لونګو دانې به د بکترياوو په وسيله رامنځ ته شوی بوی پټ کړي.

    – يوه جوړه بوټان هر وخت مه اغوندئ: هڅه وکړئ چې دوه يا څو جوړې بوټان ولرئ، هغه د بوټان چې د خولو له امله لونده شوې دی، پرېږدئ چې وچ شي، پرځای يې بل جوړ بوټان په پښو کړئ.

    بوټان مو وباسئ: کله چې په موټر او يا بل څه کې ناست وی او مزل نه کوئ نو په دغه وخت کې مو بوټان وباسئ، ترڅو جورابې او بوټان دواړه ښه وچ شي.

    – په مالګه سره مو پښې ومېنځئ: مالګه سره د پښو مېنځل بکترياوې وژني، کله چې په مالګه سره پښې مينځئ نوبيا يې په صابون مه پاکوئ، پښو مو پرېږدئ چې د مالګې اوبه پرې وچې شي.

  • هغه اته (۸) لاملونه چې د نارينه لپاره د جنسي اړيکو په وخت کې د درد او ناراحتی لامل کيږي

    هغه اته (۸) لاملونه چې د نارينه لپاره د جنسي اړيکو په وخت کې د درد او ناراحتی لامل کيږي

    هغه اته (۸) لاملونه چې د نارينه لپاره د جنسي اړيکو په وخت کې د درد او ناراحتی لامل کيږي
    ډاکټر نيک محمد ويال – د روهي وېب پاڼې بنسټګر او  مسوول مدير 

    هر کله چې د ښځې او خاوند ترمنځ جنسي اړيکې ترسره کيږي، نو هغه جنسي اړيکي چې يو ډول درد او د ناراحتۍ لامل کيږي په انکليسي کې ورته (Painful Intercourse) وايي او علمي نوم يې Dyspareunia دی.

    درد لرونکي جنسي اړيکې يا dyspareunia په خپله يو ډول جنسي ناروغي ده، چې رواني، حسي، روغتيايي او يا ښايي نور لاملونه ولري.

    په دې لېکنه کې درته هغه اته لاملونه په ګوته کوو، چې د جنسي اړيکو په وخت کې د نارينه (سړيو) لپاره د درد او ناراحتۍ لامل کيږي.

    ۱- د پروستات غدې التهاب Prostatitis: د پروستات غده په نارينه او يا نورو تي لرونکو حيواناتو کې د تکثري سېستم غده ده، چې کابو ۳۰ سلنه مني ذخيره کولی شي. د پروستات د غدې التهاب او ميکروبې کېدنې ته Prostatitis وايي، د Prostatitis ناروغۍ له امله د نارينه د تناسلې آلې لاندې برخه پړسوب پيدا کوي، د اغېزمنې برخې د پوستکې رنګ هم سور وي.
    کله چې نارينه ادرار (تشې متيازې) کوي او يا هم انزال ته رسيږي، نو تناسلي آله سخت درد کوي.

    ۲- د بولي يا ادراري برخو عفونې (ککړلېدنه) کېدنه Urinary tract infections: په Urinary tract کې پښتورګي، حالبين (له پښتورګو څخه تر مثانې پورې ۳۰ سنتې متره اوږده پيپونه)، مثانه او بولې مجرا شامله ده، چې ورته اطراحيه سېسټم هم وايي.
    د Urinary tract له پورته برخو څخه چې هره يو زيانمنه شوې وي او يا کوم ډول ناروغي ولري، نو د نارينه لپاره د جنسي اړيکو په وخت کې د درد لامل کيږي او همدارنګه شونې ده چې يو شمېر ويرسونه او ناروغۍ د ژوند ملګرې ته هم ورسيږي.

    ۳- د مخمر ککړېدنه Yeast infections: مخمر يا Yeast يو ډول فنجي دی، چې د نارينه د تناسلي آلې د ميکروبي کېدو لامل کيږي. کله چې د مخمر ککړېدنه شتون ولري، نو د نارينه د تناسلي آلې سر خارښت کوي او د سوځېدنې احساس موجود وي، چې په پايله کې يې د نارينه لپاره جنسي اړيکې دردلرونکې وي.

    ۴- د بولې مجرا د پوستکي ناروغي Dermatitis: د صابون، شامپو، سپرې او نورو کمياوي شيانو پر وړاندې د نارينه تناسلي آله حساسيت يا الرجي پيدا کوي، ياد حساسيت د تناسلي آلې د پړسوب، سوروالي او درد لامل کيږي، چې د جنسي اړيکو په وخت کې درد او ميکروبي کېدنه منځ ته راتلی شي.

    ۵- هرپېس Herpes: د نارينه د تناسلې آلې بله خطرناکه ناروغي د هرپېس په نوم ده. په هرپېس کې د بولي مجرا په سر او يا لاندې برخه کې ټپ او زخم پيدا کيږي، نو غوره ده چې د يادې ناروغۍ په شتون کې د جنسي اړيکو له ترسره کولو ډډه وشي.

    ۶- پسارای سېس Psoriasis: پسارای سېس د بولي مجرا د پوستکي بله ناروغي ده، چې د بولي مجرا پوستکی خارښت کوي او سرې کوچنۍ دانۍ په بولي مجرا راپيدا کيږي. پسارای سېس جنسي اړيکو ته د درد او ناراحتی لامل کيږي، چې له درملنې وړاندې يې بايد له جنسي يوځای کېدنې مخنيوی وشي.

    ۷- فېموسېس Phimosis: په دې ناروغۍ کې د بولې مجرا د سر پوستکی زیات کش، سور، وچ او سخت وي، چې نارينه د جنسي اړيکو په جريان کې او پرته له جنسي اړيکو درد احساس کوي.

    ۸- پارا فېموسېس Paraphimosis: پارا فېموسېس د فېموسېس د ناروغۍ سخت ډول دی، په دې ناروغي کې د نارينه د تناسلي آلې پوستکی دومره وچ او سخت وي، چې د تناسلي آلې د سر په لورې نه کشکول کيږي، ياده ستونزه تر ډېره په هغه کسانو کې وي، چې سنت شوي Circumcise شوي نه وي.

    درملنه:
    پورته ذکر شوې ټولې ناروغۍ بېلا بېل لاملونه لري او په کورنۍ درملنه ښايي ستونزه نور هم ډېره شي، نو غوره ده چې له يورولوجېسټ Urologist ډاکټره سره پرې مشوره وشي او د ناروغۍ اړوند درمل خوړل شي.

  • پوستکي ته دشيدو حيرانوونکي ګټه ښکاره شوه

    پوستکي ته دشيدو حيرانوونکي ګټه ښکاره شوه

    نن سبا په نړۍ کې ګڼ شمېر ښځې او نارینه خپلې ډېرې پیسې په سینګار توکو لګوي څو ښایسته ښکاره شي او پوستکی یې خراب نه شي؛ خو شيدې بیا هغه څه دي چې هم ارزانه دي او هم پر ښایست سربېره، د روغتیا لپاره ګټورې دي. په شيدو کې شته مواد د پوستکي د زړښت مخه نیسي، ځوان او تازه یې ساتي. په شیدو کې شته لاکتیک اسید د بدن پوستکي ته یو پوښ ورکوي، چې د دغه پوښ ځلا په پوستکي کې د ښایست لامل کيږي. څېړنو ثابته کړې ده، چې په شيدو کې شته ويټامین B12، پروټین او کلسیم د پوستکي د خرابېدو او وچېدو مخه نیسي. تر ډېره په هغه کريمو کې چې د مخ د نرموالي لپاره کارول کيږي، لاکتیک اسید شتون لري چې دغه ماده په زیاته کچه په شېدو کې هم موندل کيږي. دغه راز که په اونۍ کې یو یا دوه ځله د شيدو له ماسک څخه ګټه واخیستل شي، له وخت مخکې د زړښت او د مخ د پوستکي د ګونځې کېدو مخه نیسي. دغه راز که په ورځني ډول یو ګيلاس شیدې وڅښل شي، د روغتیا لپاره ګټورې دي، غاښونه، نوکان او وېښتان هم روغ ساتي.

  • د خولې بدبوي څه ته وايي، لاملونه او درملنه يې

    د خولې بدبوي څه ته وايي، لاملونه او درملنه يې

    د خولې بدبوي څه ته وايي، لاملونه او درملنه يې
    ډاکټر نيک محمد ويال – د روهي وېب پاڼې بنسټګر او  مسوول مدير 

    د خولي بدبوي چې د تنفس يا ساه بدبوي هم ورته وايي په انګليسي کې ورته Bad Breath وايي او علمي نوم يې Halitosis دی. د خولي بدبوي په خپله د ناروغ لپاره کومه د ډېرې اندېښنې خبره نه ده، خو ټولنيز ژوند باندې بد اغېز کوي او چاپيره خلک درسره ناراحت احساس کوي.

    د خولې بدبوي يا Halitosis په دوه ډوله ده، يو يې لنډمهاله او بل يې بيا اوږد مهاله ده.
    لنډمهاله هغه ده، چې د ځينو ځانګړو خوراکونو لکه پياز، هوږې، ګلپي، ګندنې او نورو پربنسټ منځ ته راځي او له درېيو او يا دوو ساعتونو وروسته له منځه ځي.

    اوږد مهاله بيا د بدن د داخلي سېسټمونو سره تړاو لري او سرچينه يې د بدن له داخل څخه وي، ترهغه پورې له منځه نه ځي ترڅو چې د سرچينې ستونزه له منځه نه وي تللي.

    د خولې د بدبوۍ يا Bad Breath لاملونه:
    ۱- د خولې وچوالی: د خولې د بدبوۍ تر ټولو لوی لامل د خولې وچوالی دی، تاسو به هم تجربه کړې وي، چې هرکله سهار له خوبه پاڅيږي له خوراک او څښاک وړاندې مو خوله وچه وي او په پايله کې د خولې بدبوي منځ ته راځي. همداډول د روژې په مبارکه مياشت کې، چې د ورځې په يوه لويه برخه کې خوراک او څښاک نه شو کولی، نو بيا هم خوله بدبوۍ ورکوي.
    يادونه: د اسلام د سپيڅلې دين د ارشاداتو اړوند، د لوی خدای (ج) پر وړاندې د روژه لرونکي کس د خولې بوی د عطر او مشک څخه بهتر دی.

    ۲- خوراک: يو شمېر خوراکونه لکه پياز، هوږه، ګلپي، ګندنه او داسې نور چې تيز بوی لري، د خولې د بدبوۍ سبب هم کيږي. خو څه ډول مو وړاندې يادونه وکړه، چې اغېز د لنډ وخت لپاره وي او وروسته له منځه ځي.

    ۳- تنسلونه: د خولې دننه په لاندنۍ برخه او له مرۍ څخه د پاسه دوه ګردۍ غوټۍ شتون لري چې تنسلونو په نوم ياديږي. په تنسلونه پورې اکثر وخت مړې شوې حجرې او بلغم نښلي، چې يادې حجرې او بلغم د خولې د بد بوۍ يو بل لامل ګڼل کيږي.

    ۴- د معدې ټپ يا Ulcer: د معدې د تېزابو په ډېروالي او هم په ځينو نورو لاملونو سره معده زخم پيدا کوي، د معدې زخم د هضمې سېسټم ګډوډ کوي، دا چې خوله هم د هضمې د سېسټم يو غړی دی نو يې په پايله کې بده ساه ورکوي.

    ۵- د وريو يا Periodontal ناروغي: د وريو ناروغي د بکترياوو په وسيله د غاښونو د چاپيره ساحې خراب کول او ميکروبي کول دي. که چېرې خپل غاښونه هره ورځ کريم – بورس کوي خو بيا هم د خولې د بدبوۍ له ستونزې ځوریږي، نو پوهه شئ، ستونزه او ناروغي په اوريو کې ده.

    ۶- سګرېټ: د سګرېټو څکول په خوله کې په Saliva يا لعابيه غدو باندې د وچوالي اثر کوي او په خوله کې لعابيه لاړې وچيږي، چې په دې سره هم د خولې د بدبوۍ سبب منځ ته رتللی شي.

    ۷- ځيني ناروغۍ: شګور، نفس تنګي، د برنشونو ناروغي، د معدې او کولمو ګډوډي او ځېني نور ، د خولې د بدبوۍ لاملونه شمېرل کيږي.

    ۸- د غاښونو سوري: خراب غاښونه او په غاښونو کې سوري د خولې د بدبوۍ يو بل لامل دی. د غاښونو په سوريو کې د ډوډۍ زرې پاټې کيږي چې د بکترياوو په وسيله پرې پروسه ترسره کيږي او يا يادې زرې خوسا کيږي او بدبوۍ منځ ته راوړي.

    ۹- ژبه: د ژبې په سر يو ډول نرم پشم شتون لري. کله چې خوله بورس کوي خو بيا هم د خولې بدبوۍ له منځه نه ځي، نولامل يې په ژبه باندې د خوراکي موادو د زراتو پاتې کېدنه ده.

    ۱۰- زيات وزن: څېړنو ښوودلې ده، چې ډېر وزن لرونکي کسان هغه کسانو په پرتله چې هم وزن د خولې د بدبوۍ له ناروغۍ ډېر ځوريږي. ډېر وزن له يادې ستونزې پرته لسګونه نورې ستونزې لکه فشار، د زړه ستړيا، نفس تنګي ….. هم منځ ته راوړي.

    د خولې د بدبوۍ نښې: د خولې وچوالی، د ژبې په سطحه سپين والی، د خولې د خوند ترېخوالی د خولې د بدبوۍ نښې دي.

    د خولې دبدبوۍ درملنه:
    ۱- غاښونه او ژبه: د خولې دبدبوۍ د مخنيوي لپاره يوه اسانه لاره دا ده، چې په منظم ډول مو غاښونه او ژبه کريم – بورس کړئ. په ځانګړې ډول هڅه وکړئ، چې د ډوډۍ له خوړلو وروسته او له خوب وړاندې دغه کړنه ترسره کړئ.

    ۲- خوله مو لنده وساتئ: څه ډول مو چې وړاندې په لاملونو کې يادونه وکړه، نو هڅه وکړئ چې ډېرې اوبه او يا نور مشروبات وڅښئ ترڅو خوله مو په پوره اندزه سره له وچوالي ساتلې وي.

    ۳- سګېرټ پرېږدئ: که چېرې د سګرېټو، نسوارو او تمباکو معتاد وي، نو خوشې يې کړئ.

    ۴- ژوالې Gum: هغه ژوالې چې په ډېر مقدار سره خواږه او بوره ونه لري، خوله هروخت لنده ساتي، د ژوالو ژول درسره مرسته کوي له دغه ستونزې خلاص شی.

    ۵- داخلي ناروغۍ: که چېرې مو په خوله او ژبه کې هغه نښې او نښانې نه وي چې وړاندې مو ذکر کړې، نو بيا ستونزه د داخلي غړو د ناروغيو له امله ده، غوره ده چې له اړونده ډاکټر سره پرې وګورئ.

    ۶- غاښونه: د غاښونو سوري مو ډک کړئ، که غاښونه مو زيړ او تور شوي وي نو پر وخت يې درملنه وکړئ او له اړونده ډاکټر سره د غاښونو د مېنځلو په اړه مشوره وکړئ.

  • تور چای هډوکي ته حيرانووکي ګټي ښکاره شوي

    تور چای هډوکي ته حيرانووکي ګټي ښکاره شوي

    څېړنو ثابته کړې، هغه کسان چې تور چای څښي د هغو په پرتله چې هېڅ چای نه څښي، پياوړي هډوکي لري او د هډوکو د وروستوالي پر ناروغۍ نه اخته کيږي. چینایي څېړونکو تر ۱۵ کلنو څېړنو او پلټنو وروسته ثابته کړې چې په ورځ کې د درې یا څلور ګيلاسه چای څښل، ۳۷ سلنه د هغو عواملو مخنیوی کوي، چې د هډوکو د وروستوالي سبب کيږي. دغه راز ويل شوي، چې ټول څښاک ورته خاصیت یا ځانګړنه نه لري. د بېلګې په ډول، قهوه چې ډېر کاله د چايو پر ځای کارول کيږي د هډوکو له پياوړي کولو سره مرسته نه کوي. څېړونکي لا نه دي بريالي شوي چې ثابته کړي، چای ولې د هډوکو له پياوړتيا سره مرسته کوي. ډاکټران وایي، فلوراید، کلیسم او نور معدني مواد هډوکي قوي ساتي. دغه راز تور چای د انټي اکسیدانو تر ټولو ښه سرچینه ده چې د بدن دفاعي سيسټم پیاوړی کوي او د وینې د لوړ فشار مخه هم نيسي. څېړونکي وایي، د تور چای ښېګڼې یوازې دا نه دي، بلکې د شکرې ناروغۍ د کنټرول لپاره هم ګټور تماميږي.